Дацяперашні сакратар Сінода біскупаў УГКЦ заменіць у гэтым служэнні біскупа Пятра Крыка, якому ў красавіку мінулага года споўнілася 75 гадоў жыцця.
У чацвер, 18 лютага 2021 г., у Ватыкане паведамілі, што Папа Францішак прыняў адстаўку біскупа Пятра Крыка, тытулярнага біскупа Кастрамартыйскага, з ураду Апостальскага Экзарха для ўкраінцаў візантыйскага абраду, якія пражываюць у Германіі і Скандынавіі.
Адначасова паведамляецца, што Святы Айцец прызначыў Апостальскім Экзархам для ўкраінцаў візантыйскага абраду ў Германіі і Скандынавіі ўладыку Багдана Дзюраха, CSsR, тытулярнага біскупа Вагадскага, дацяперашняга курыяльнага біскупа Курыі Вярхоўнага Архібіскупа і сакратара Сінода біскупаў Украінскай Грэка-Каталіцкай Царквы.
Апостальскі экзархат у Германіі і Скандынавіі апякуецца ўкраінскімі грэка-католікамі ў Германіі, Фінляндыі, Нарвегіі, Даніі і Швецыі. Ён быў заснаваны 17 красавіка 1959 г. Папам Янам XXIII як Апостальскі экзархат для ўкраінцаў-католікаў візантыйскага абраду ў Германіі, а ў 1984 г. яго юрысдыкцыя распаўсюдзілася на скандынаўскія краіны. Катэдральны сабор і курыя экзарха знаходзяцца ў Мюнхене.
Біскуп Богдан Дзюрах, CSsR, які некалькі дзён таму адзначыў 15-годдзе біскупскай хіратоніі, стаў трэцім Апостальскім экзархам для ўкраінцаў візантыйскага абраду ў Германіі і Скандынавіі. Ураджэнец Львоўшчыны, ён атрымаў святарскія свячанні ў 1991 г., а ў 1995 г. склаў вечныя абеты ў Кангрэгацыі Найсвяцейшага Адкупіцеля. Абараніў дактарат з багаслоўя у Варшаве.
Абвешчаны ў канцы 2005 г. дапаможным біскупам Кіева-Вышгарадскай архіепархіі УГКЦ, 15 лютага 2006 г. уладыка Багдан атрымаў архіярэйскія свячанні. У тым жа годзе ён быў абраны сакратаром Сінода біскупаў УГКЦ, а затым быў двойчы пераабраны на наступныя 5-гадовыя тэрміны. З 2009 г. – біскуп Курыі Вярхоўнага Архібіскупа.