У флэшмобе #маямова мы пабачылі гісторыі беларусак і беларусаў, якія асэнсавана дадаюць беларускую мову ў сваё жыццё. Выбар мовы непарыўна звязаны з суб’ектнасцю асобнага чалавека і ўсёй грамадзянскай супольнасці.

Якая сувязь беларускай мовы і суверэнітэту? Як звязаная вайна Расеі супраць Украіны з беларускай мовай? Чаму хтосьці кажа, што пераходзіць на беларускую складана, і ці сапраўды гэта так? На гэтыя пытанні адказвае лідэрка *Сумленных людзей Алена Жываглод:

• «Беларускам і беларусам важна пераходзіць на беларускую мову. Павольна ці хутка, але гэты працэс ужо адбываецца. Гэта пытанне асэнсаванага выбару, самасвядомасці, суб’ектнасці беларускага народу».

• «Разумею, чаму пераход з рускай мовы на беларускую можа быць складаным. Сапраўды, мне асабіста прасцей застацца на рускай. Але просты шлях не заўсёды лепшы. Мы шмат гадоў не звярталі ўвагі на тое, што руская мова паўсюль насаджваецца, а беларускую мову дыскрымінуюць на розных узроўнях».

• «Шмат гадоў мы жылі ў адной інфармацыйнай прасторы з Расеяй — і нам так было камфортна. Мы глядзелі расейскае ТБ, сачылі за жыццём расейскіх зорак і святкавалі Новы год двойчы: па Мінску і па Маскве. Нас такіх было вельмі-вельмі шмат. Для многіх з нас было звыклым, што беларуская мова фактычна вывучаецца як замежная, а руская літаратура — як родная».

• «Асэнсаванне важнасці беларускай мовы надыходзіць праз жудасныя падзеі: рэпрэсіі, вайну, пагрозу страты незалежнасці для Беларусі. Праз атакі прапаганды Крамля і спробы абароны ад яе. Праз наўмыснае знішчэнне ўсяго беларускамоўнага, што ёсць у краіне».

• «У 2020 годзе сотні тысяч беларусаў і беларусак усвядомілі сябе грамадзянамі Беларусі — магчыма, першы раз за жыццё. Уздым грамадзянскай свядомасці прывёў таксама да пытання: а хто мы, беларусы? Якія мы? Якія ў нас каштоўнасці? І на якой мове мы размаўляем?»

Пышыраючы беларускамоўную прастору, мы з вамі ўзмацняем і суверэнітэт беларускага народу. Беларуская мова — гэта наш асэнсаваны выбар, які мы робім нягледзячы на антыбеларускую палітыку дзяржавы.

@honestpeople_by
#мычестныелюди #мысумленныялюдзі #строимгражданскоеобщество