8 сакавіка 1910 года ў вёсцы Турэц (сёння Карэліцкі раён) нарадзіўся выбітны беларускі оперны спяв…

8 сакавіка 1910 года ў вёсцы Турэц (сёння Карэліцкі раён) нарадзіўся выбітны беларускі оперны спявак Пётр Конюх. Адзін з выканаўцаў духоўнага гімна Беларусі — «Магутны Божа»

Ён праславіўся на сусветных сцэнах і нават за акіянам не забываў родныя беларускія мелодыі.

Да Другой сусветнай вайны Конюх працаваў у Баранавічах, а ў 1938 годзе скончыў сельскагаспадарчыя курсы ў Вілейцы. Пачатак вайны заспеў яго ў Ржэве, дзе ён вучыўся на льнаводчых курсах.

Пазней ён трапіў у Другі польскі корпус генерала Андэрса і ваяваў з нацызмам у Паўночнай Афрыцы і Паўднёвай Еўропе. Удзельнічаў у бітве пры Монтэ-Касіна ў 1944 годзе, дзе быў цяжка паранены. За ўдзел у баях быў адзначаны італьянскімі ўзнагародамі і памятным крыжам «За Монтэ-Касіна».

Пасля вайны застаўся ў Італіі. Дзякуючы ваеннай стыпендыі скончыў Рымскую акадэмію мастацтваў (1951), атрымаўшы дыпломы спявака і маэстра. Выступаў на сцэнах Еўропы і свету, спяваў на беларускай, італьянскай, польскай, французскай, англійскай, нямецкай, рускай і ўкраінскай мовах.

У 1950 годзе пераехаў у ЗША, дзе не толькі выступаў, але і выкладаў вакал. Беларуская песня заўсёды займала асаблівае месца ў яго рэпертуары — сучаснікі адзначалі, што асабліва пранікнёна ён выконваў «Палыночак».

У 1957 годзе Конюх перамог на Міжнародным конкурсе вакалістаў у Рыме. Пазней адкрыў уласныя вакальныя школы ў Гамбургу і Нью-Ёрку і дапамагаў ставіць голас беларускім выканаўцам, у тым ліку Данчыку.

У яго выкананні былі запісаны на кружэлкі і беларускія песні, у тым ліку «Магутны Божа». «Magutny Bozha». Piotr Koniuch. Bass. USA.

У 1975 годзе ён наведаў Беларусь, дзе сустракаўся і пасябраваў з Рыгорам Шырмай, Янкам Брылем і іншымі дзеячамі культуры.

Пётр Конюх памёр 14 ліпеня 1994 года. Пахаваны на беларускіх могілках у Іст-Брансвіку (штат Нью-Джэрсі, ЗША).

У 2008 годзе «Беларусьфільм» зняў дакументальны фільм пра яго жыццё і творчасць.