By Belkorpus Размаўляць на роднай мове – гэта самае малое і адначасова самае простае, што мы можам зрабіць ва ўмовах рэпрэсій, жаху і паняверкі.
Мы прапануем вам тактыку моўных дыверсій. Вы ўжо размаўляеце па-беларуску? Выдатна. Не? Яшчэ не, але імкнецеся? Тады вам з намі.
Сёння мы паразмаўляем пра такую папулярную з’яву, як электронныя чэргі. Яны зараз шмат дзе: у паліклініках, на пошце, у банках і г.д.
Дастаткова зручна: ўзяў квіток і сядзі спакойна, пакуль электрычны голас цябе ня выкліча.
Дарэчы, а на якой мове размаўляе гэты апарат? Так, па-расейску.
Расейская мова там прэвалюе па змаўчанні. Але паглядзіце ўважліва: шмат на якіх апаратах існуе выбар мовы.
Дык вось сама дыверсія: падыходзіце да апарата электроннай чаргі і пераключаеце яго на беларускую мову. Пасля гэтага ён пачынае і пісаць на экране па-беларуску, і нумары чаргі па-беларуску ўголас абвяшчае. Проста, як граблі! І, як паказвае практыка, людзі не пераключаюць ізноў на расейскую – большасці ўсё роўна, на якой мове гучаць абвесткі.
Таму давайце навучым электронныя мазгі, якая мова ёсьць правільнай. А заадно, каб мазгі не электронныя беларускую мову ўспрымалі на слых, седзячы ў чарзе.
P.S. Калі нас зараз чытае які наладчык ці праграміст гэтых апаратаў, то, калі ласка, усталюйце ў іх па змаўчаньні прыарытэт беларускай мовы.
#што_рабіць