24 лютага 1935 года, на хутары Верасоўка, Ушацкі раён, Віцебская вобласьць, нарадзіўся Рыгор Барадулін, апошні беларус, якому надалі званне Народнага паэта (1992). Быў Ганаровым доктарам БДУ й ганаровым грамадзянінам Ушацкага раёну.

Божа, паспагадай усім, –
I магутнаму, і слабому,
I відушчаму, і сляпому,
Каб у згодзе жылося ім.

Божа, паспагадай усім, –
Каб вайной не йшоў
Брат на брата,
Каб ржавела сякера ў ката,
Каб вячэраю пахнуў дым.

Божа, паспагадай усім, –
Каб цяплелі пагляды людзкія,
Каб у старца не кралі кія,
Нічыіх не кралі радзім.

Да любові, да чысціні,
Да святла, да святога ўлоння,
Усявышні, і заўтра і сёння
Заблуканыя душы вярні!