By Belkorpus Інстытут Усходняй Еўропы Варшаўскага ўніверсітэта аб’явіў набор кандыдатаў на праграму дыпламатыі. Гэты курс з’яўляецца працягам праекту падрыхтоўкі спецыялістаў у рамках праграмы “Салідарны з Беларуссю“.
Праграма дыпламатыі Варшаўскага ўніверсітэта – гэта ўнікальная праграма, накіраваная на навучанне новых беларускіх дыпламатычных кадраў у Польшчы. Курс будзе ўключаць аналіз палітычнай сітуацыі ў Беларусі і на постсавецкай прасторы, тэорыі і практыкі палітыкі і дыпламатыі, знешняй палітыкі і палітыкі бяспекі, дыпламатычны пратакол, міжнароднае права і інш. Навучанне будзе праводзіцца з удзелам дасведчаных лектараў і дыпламатаў, у супрацоўніцтве з Дыпламатычнай акадэміяй Міністэрства замежных спраў Рэспублікі Польшча.
Таксама некалькі лекцый для слухачоў правядуць дасведчаныя беларускія дыпламаты: кіраўнік НАУ Павел Латушка і намеснік кіраўніка НАУ Уладзімір Астапенка.
Патрабаванні да кандыдатаў:
– беларускае грамадзянства;
– закончаная вышэйшая адукацыя (пераважныя спецыяльнасці: права, гісторыя, міжнародныя адносіны, палітычныя і сумежныя навукі);
– веданне і цікавасць да пытанняў у галіне палітыкі і міжнародных адносін у рэгіёне Цэнтральнай і Усходняй Еўропы;
– веданне англійскай мовы на ўзроўні B2 мінімум (што забяспечыць разуменне лекцый і актыўны ўдзел у занятках па праграме);
– веданне польскай мовы;
– узроставае абмежаванне: да 35 гадоў.
Прапануецца:
– бясплатнае навучанне;
– ліміт месцаў: 20;
– унікальная, модульная праграма навучання, накіраваная ў першую чаргу на атрыманне досведу і практычных навыкаў;
– мовы навучання: польская, англійская, беларуская, руская;
– інтэнсіўны курс польскай мовы падчас праграмы;
– магчымасць стажыроўкі / атрымання досведу ў вядомых польскіх установах, а таксама, магчыма, у міжнародных і наднацыянальных установах;
– штомесячная стыпендыя ў памеры 2400 злотых (выплачваецца толькі падчас знаходжання ў Польшчы).
Апошні тэрмін падачы заявак:
25 лістапада 2022 г., 23:59 па польскім часе.
Неабходныя дакументы і падрабязную інфармацыю аб праграме можна знайсці на сайце Варшаўскага ўніверсітэта.
Крыніца: НАУ