Што такое грынвошынг? У «Кропцы» мы паступова імкнемся да таго, каб прадукты, мыючыя сродкі і іншыя …

Што такое грынвошынг?

У «Кропцы» мы паступова імкнемся да таго, каб прадукты, мыючыя сродкі і іншыя рэчы, якія мы выкарыстоўваем, былі бяспечнымі для людзей і наваколля. І тут важна памятаць, што не ўсе вытворцы аднолькава адказныя. Сёння пагаворым пра грынвошынг.

Грынвошынг (greenwashing) — гэта форма экалагічнага маркетынгу, якая ўводзіць спажыўца ў зман адносна экалагічнасці прадукцыі або паслуг.

Тэрмін з’явіўся ў 1986 годзе, калі было апісана, як гатэлі прапаноўвалі адмовіцца ад штодзённай замены бялізны, абгрунтоўваючы гэта клопатам пра каралавыя рыфы, хоць на самой справе гэта рабілася для эканоміі сродкаў, а гатэлі працягвалі забруджваць навакольнае асяроддзе.

Прыклады грынвошынга:

Папяровая ўпакоўка. Вытворцы падкрэсліваюць яе экалагічнасць, але выраб паперы знішчае лясы і выкідвае парніковыя газы. Таксама пры вытворчасці паперы часта выкарыстоўваецца хлор для адбельвання.

Агульныя тэрміны. Словы «натуральны», «прыродны» і інш. могуць быць зманлівымі, бо не ўсё прыроднае бяспечна (напрыклад, уран, ртуць, мыш’як).

Чаму вытворцы ідуць на такія хітрыкі?

Вытворцы хочуць захаваць лаяльнасць эка-зацікаўленай аўдыторыі, выкарыстоўваючы танныя матэрыялы, і прыцягнуць новых кліентаў, ствараючы ўражанне экалагічнага брэнда.

Як супрацьстаяць грынвошынгу:

Пазбягайце кампаній «fast fashion»

Купляйце ўжываныя рэчы, абменьвайцеся адзеннем з сябрамі (можна арганізаваць swap-party) або інвестуйце ў рэчы свядомых брэндаў

Навучыцеся распазнаваць сапраўдныя экалагічныя сертыфікаты

Пішыце лісты-звароты да карпарацый, калі бачыце, што яны несумленныя з пакупніком

Правярайце сцвярджэнні пра экалагічнасць прадукцыі

Выкарыстоўвайце дадаткі для праверкі экамаркіровак (напрыклад, EcoLabelGuide)

Грынвошынг — гэта маніпуляцыя, і для барацьбы з ёй трэба быць інфармаваным і крытычным спажыўцом.

#карысна_ведаць