Сёння спаўняецца 105 гадоў з пачатку Слуцкага збройнага чыну — аднаго з найбольш гераічных і трагічн…

Сёння спаўняецца 105 гадоў з пачатку Слуцкага збройнага чыну — аднаго з найбольш гераічных і трагічных эпізодаў барацьбы беларусаў за сваю дзяржаўнасць. 27 лістапада 1920 года слуцкія паўстанцы, сфармаваныя на тэрыторыі Слуцкага павета, узнялі зброю супраць бальшавікоў, абараняючы незалежнасць Беларускай Народнай Рэспублікі. Гэты дзень многія беларусы лічаць Днём герояў.

Пасля спынення савецка-польскай вайны перад беларусамі на кароткі момант адкрылася магчымасць аднаўлення сваёй улады. На землях, адкуль адыходзілі польскія войскі, але куды яшчэ не ўвайшлі бальшавікі, ствараліся мясцовыя органы самакіравання. У лістападзе 1920-га была ўтворана Слуцкая Рада, дзе пачалі фарміравацца паўстанчыя войскі.

Барацьба працягвалася больш за месяц. Паўстанцы, сфармаваныя ў асноўным з мясцовых сялян, мелі шырокую падтрымку насельніцтва. На першым этапе яны здолелі адганяць бальшавікоў, праводзіць паспяховыя атакі і вызваляць вёскі. Да іх далучыліся часткі арміі генерала Булак-Балаховіча і атрады арганізацыі «Зялёны дуб».

Беларусы змагаліся мужна, але ім не хапала зброі і амуніцыі. Сітуацыю змяніла прыбыццё на беларускі фронт дадатковых савецкіх частак з цэнтральнай Расіі. У канцы снежня 1920 года паўстанцы былі вымушаныя адысці на тэрыторыю Заходняй Беларусі.

Нягледзячы на паразу, Слуцкі збройны чын стаў сімвалам непакорнасці, прыкладам мужнасці і веры, змагання за сваю дзяржаву. Беларуская воля жыве і зараз — у кожным беларусе, які змагаецца супраць прамаскоўскага рэжыму Лукашэнкі.