Няма прамых сведчанняў, што свята Перамянення першапачаткова было звязана з блаславеннем пладоў, бо…

 Няма прамых сведчанняў, што свята Перамянення першапачаткова было звязана з блаславеннем пладоў, бо першаплады маглі благаслаўляць і на свята Успення Найсвятой Багародзіцы, і нават на свята Узвіжання Пачэснага Крыжа. У той жа час, варта ўлічыць, што найперш гаворка ідзе пра блаславенне вінаграду, які паспяваў у Палесціне на пачатку жніўня. Існавала традыцыя высушваць вінаград, у тым ліку будуючы для высушвання вінаграду палаткі, а таму свята Перамянення, у кантэксце згадвання старазапаветнага свята Кучак, пасуе да блаславення пладоў значна больш, чым свята Успення або тым больш Узвіжання Пачэснага Крыжа.

Бласлаўляючы першаплады вінаграду, Царква выказвала падзяку не проста за дары зямлі, а за яднанне з Ісусам, «вінаграднай лазой», у якім мы маем жыццё, як гэта выказана ў малітве на асвячэнне вінаграду ў трэбніку Пятра Магілы:

«Божа, Збаўца наш, Ты захацеў вінаградам назваць Адзінароднага Твайго Сына, Госпада Бога і Збаўцу нашага Ісуса Хрыста, і праз Яго плод неўміручасці нам дараваў! Сам і цяпер гэты вінаградны плод блаславі, і нас, рабоў Тваіх, што будуць спажываць ад яго, учыні прычаснікамі Праўдзівага Вінаграду, захавай наша жыццё непашкоджаным і мір нам заўсёды даруй, і вечнымі Тваімі неад’емнымі дараваннямі жыццё наша ўпрыгож, малітвамі Найсвяцейшай Валадаркі нашай Багародзіцы і Заўсёды Дзевы Марыі і ўсіх святых, што ад веку Табе дагаджалі. Бо Ты добры і чалавекалюбны Бог, і Табе славу аддаём, Беспачатнаму Айцу з Адзінародным Тваім Сынам, і з Найсвяцейшым і Добрым, і Жыватворчым Тваім Духам, цяпер і заўсёды, і на векі вякоў».