Хрысьціянскае жыцьцё – гэта пілігрымка да Бога, – нагадаў Папа ў пасланьні на 39-ы Сусьветны дзень моладзі, які будзе адзначацца на дыяцэзіяльным узроўні 24 лістапада 2024 году, ва ўрачыстасьць Хрыста Валадара Сусьвету.

На пачатку пасланьня Рымскі Архірэй выказаў блізкасьць моладзі, якая плаціць самы высокі кошт жыцьця ў часы, «пазначаныя драматычнымі сітуацыямі, што спараджаюць роспач і не дазваляюць нам глядзець у будучыню з спакойнай душой: трагедыяй вайны, сацыяльнай несправядлівасьцю, няроўнасьцю, голадам, эксплуатацыяй чалавека і стварэньня».

Папа заклікаў не апускаць рукі і памятаць, што нашае жыцьцё – гэта пілігрымка ў пошуку шчасьця, «пілігрымка да Бога, нашага збаўленьня і паўнаты ўсякага дабра». Варта вырушыць у яе, а ня проста «глядзець на жыцьцё з балкону», – нагадаў Францішак.

Сьвяты Айцец заўважыў, што, пазьбягаючы сур’ёзных выклікаў і запаўняючы жыцьцё мноствам пустых справаў, чалавек уваходзіць у нуду, якая ператвараецца ў «стан апатыі і незадаволенасьці, уласьцівы тым, хто ніколі не выходзіць у шлях, не вырашае, не выбірае, не рызыкуе, а аддае перавагу прабываньню ў сваёй зоне камфорту, закрытасьці ў сабе, бачачы і ацэньваючы сьвет з-за экрану, ніколі не “пэцкаючы рукі” праблемамі, іншымі людзьмі, жыцьцём».

Папа адзначыў, што сродкам ад стомленасьці ў жыцьці зьяўляецца надзея. «Надзея перамагае ўсякую стому, усякі крызіс і ўсякую трывогу, даючы моцную матывацыю, каб ісьці наперад», – сказаў ён, нагадваючы, што надзея зьяўляецца дарам, які Бог нам дае, каб мелі сілы працягваць шлях да мэты, нягледзячы на цяжкасьці.

Больш гл. тут:
https://www.vaticannews.va/be/papa/news/2024-09/papa-na-sdm-2024-idzice-pa-zhycci-yak-piligrymy-ne-yak-turysty.html