Сказаў Госпад: Сцеражыцеся, каб не ўвялі вас у зман; бо многія прыйдуць пад імем Маім, кажучы, што гэта Я. І гэты час наблізіўся; не ідзіце за імі. Калі ж пачуеце пра войны і смуты, не жахайцеся, бо гэта павінна быць спачатку; але не адразу канец.

І будуць знаменні на сонцы і месяцы, і зорках, а на зямлі туга народаў у роспачы ад шуму марскога і хвалявання; і людзі будуць мярцвець ад страху і чакання таго, што надыходзіць на сусвет, бо сілы нябесныя зрушацца, і тады ўбачаць Сына Чалавечага, Які прыйдзе на воблаку з сілаю і славаю вялікаю.

Неба і зямля мінуць, а словы Мае не мінуць. Сцеражыцеся, каб сэрцы вашы не абцяжарваліся абжорствам і п’янствам, і клопатамі жыццёвымі, і каб не прыйшоў да вас неспадзявана дзень той; бо ён, як пастка, прыйдзе на ўсіх, што жывуць на абліччы ўсёй зямлі; дык будзьце пільныя і ўвесь час маліцеся, каб спадобіліся вы пазбегнуць усяго гэтага, што мае адбыцца, і стаць перад Сынам Чалавечым. (Лк. 21, 8-9. 25-27. 33-36)