Который-то порядокъ церкви Божой отъ часовъ апостольскихъ зачатый тривалъ по вси вѣки, а тако, ижъ вси патріархи до единого потомка Петра святого, папы Римского, завжды въ науцѣ вѣры и пріймованью власти духовной и въ судахъ епископскихъ и въ апеляцыяхъ утекалися, яко се то зъ Соборовъ и правилъ святыхъ Отецъ показуетъ, и наши Словенскіе писма зъ Греческихъ зъ стародавна преложоные достаточнѣ то показуютъ, и старые святые Отцы церкви Восточной то свѣтчатъ, которые-то и Петра святого престолъ и старѣйшенство и власть его надъ епископы всего свѣта знають. /…/
Отъ которого соединенія церковного Царигородскіе патріархове коли зась отступили, и за такій свой грѣхъ отступленья и розорванья единости церковной въ моцъ поганскую Турецкую впали: зачимъ много блудовъ и злыхъ поступковъ, и занѣханье дозору правого и въ сихъ краѣхъ Рускихъ, и много брыдкого святокупства наступило, ижъ ся ереси розсѣяли и всю правѣ Русь опановали, церквѣ пустошачи и хвалу Божую псуючи.
Мы не хотѣли быти участниками грѣху такъ великого и неволи поганьской, которая затымъ прійшла на Царигородскихъ патріярховъ, и не хотѣчу имъ росколу и розорванія въ церкви святоѣ единости помогати, и забѣгаючи спустошенію церквей и спасенію душъ людьскихъ, черезъ ереси, которые ся теперь поднесли, маючи о то совѣтъ и небезпеченство спасенія своего и стада словесного намъ отъ Бога порученого, року прошлого выправили есмо до отца святѣйшого Климентія осмого, папы Римского, послы и братію нашю, велебныхъ о Христѣ епископовъ, Ипатія Потѣя, протофронія, епископа Володимерского и Берестейского, и Кирилла Терлецкого, ексарху, епископа Луцкого и Острозского, за вѣдомостію, позволеніемъ и причиною наяснѣйшого господаря нашого короля его милости Польского и великого князя Литовского Жикгимонта третего, пана побожного (которому дай Боже щастливое и вѣчное царствованіе!),