просячи, абы насъ до своего послушенства, яко навышшый пастыръ церкви вселеньской католической принялъ, и отъ зверхности патріарховъ Царигородскихъ вызволилъ и разрѣшилъ, заховуючи намъ обряды и церемоніѣ церквей Восточнахъ Греческихъ и Рускихъ, а ни якоѣ отмѣны въ церквахъ нашихъ не чинячи, только по преданію святыхъ Отецъ Греческихъ вѣчнѣ насъ зоставилъ. Што и учинилъ, и на то свои привилеи и послы послалъ, росказуючи, абыхмо ся на синодъ созвавши, исповѣданіе вѣры святой учинили и послушенство столицы Римской Петра святого Клименту осмому и его наслѣдникомъ отдали. То есмо днесь на семъ синодѣ учинили, яко то листы наши и подписаніе властныхъ рукъ съ приложеньемъ печатей нашихъ свѣтчать. /…/»