Стрэчанне: момант, калі Стары Запавет сустрэўся з НовымСтрэчанне — гэта не пра прагнозы вясны і не …
Стрэчанне — гэта не пра прагнозы вясны і не пра барацьбу зімы з летам, а свята сустрэчы, якая адбылася на 40-ы дзень пасля Нараджэння Хрыстовага.
Што гэта за падзея?
Гэта дзень, калі Дзева Марыя і Язэп прынеслі маленькага Ісуса ў Ерусалімскі храм. Там іх сустрэў старац Сямён, які чакаў гэтага імгнення больш за 300 гадоў. Ён узяў Немаўля на рукі і зразумеў: прароцтва споўнілася, Збаўца прыйшоў. Гэта сустрэча чалавецтва (у асобе старца) са сваім Творцам.
Чаму гэта Хрыста-Багародзічнае свята?
Гэта ўнікальнае свята, якое спалучае ў сабе два сэнсы:
Гасподняе: бо Хрыстос прынесены ў храм, каб асвяціць яго Сваёй прысутнасцю.
Багародзічнае: бо гэта таксама свята Маці, якая прынесла Сына і пачула прароцтва пра тое, што «праз тваю душу пройдзе меч» (пра будучыя пакуты Хрыста).
На літургіі гэта бачна нават па колерах: святары могуць служыць у белым (колер Хрыста) або блакітным (колер Багародзіцы).
Навошта мы асвячаем свечкі?
Свечка на Стрэчанне («грамнічная») — гэта сімвал, а не магічны амулет. Калі Сямён узяў Ісуса на рукі, ён назваў Яго «святлом для асвятлення язычнікаў». Асвечаная свечка нагадвае нам, што Хрыстос ёсць святло, якое разганяе цемру граху ў нашым жыцці. Мы запальваем яе падчас малітвы, каб нагадаць сабе пра гэтае Святло.
АЛЕ галоўнае — НЕ свечкі!
Самае важнае ў гэтым свяце — гэта наша асабістая сустрэча з Богам. Свечка не «працуе» аўтаматычна як абярэг ад навальніцы ці хвароб, калі за ёй не стаіць вера. Можна прынесці дадому абярэмак свечак, але так і не «сустрэць» Бога (найбольш поўна гэтая Сустрэча адбываецца ў Таінстве Прычасця).
Ці гатовыя мы, як старац Сямён, прыняць Бога ў свае абдымкі, ці мы прыходзім толькі па воск?