15 красавіка 2015 года не стала беларускага грэка-каталіцкага святара, апостальскага візітара для бе…

15 красавіка 2015 года не стала беларускага грэка-каталіцкага святара, апостальскага візітара для беларусаў-каталікоў у замежжы і дзеяча беларускай эміграцыі ў Вялікабрытаніі — Аляксандра Надсана

11 гадоў таму адышоў чалавек, які здолеў зацікавіць Захад беларускімі даследаваннямі, адкрыў многім брытанцам, а таксама — што парадаксальна — і шматлікім беларусам саму Беларусь.

Дарэчы, у нашым прыходзе для набажэнстваў выкарыстоўваюцца пераклады, зробленыя айцом Аляксандрам Надсанам.

Прозвішча ад нараджэння — Бочка. Ягоны бацька, настаўнік Антон Бочка, быў у штабе Слуцкага збройнага чыну. У эміграцыі айцец узяў сабе новае прозвішча — Надсан (альбо На’дсон, з націскам на першы склад), паводле тагачасных правілаў беларускай мовы, каб адрознівацца і падкрэсліць уласную ідэнтычнасць.

Аляксандр Надсан нарадзіўся 8 жніўня 1926 года ў Гарадзеі (сёння Нясвіжскі раён).

Быў ганаровым доктарам Еўрапейскага гуманітарнага ўніверсітэта ў Вільні, які беларускія ўлады нядаўна прызналі «экстрэмісцкім фармаваннем».

Акрамя таго, гэтыя ж улады сёння фактычна абвясцілі вайну беларускім грэка-каталікам — напрыклад, ліквідавалі ўсе грэка-каталіцкія прыходы ў Брэсцкай вобласці.

Для нас, праваслаўных беларусаў Канстанцінопальскага патрыярхата, гэта таксама нагода выказаць салідарнасць і падтрымку вернікам грэка-каталіцкіх грамад, якія трапілі пад пераслед. Памяць пра айца Аляксандра — гэта пра ўзаемную павагу, адказнасць і хрысціянскую любоў.