By Belkorpus Я ўважліва вывучыў праект, вынесены на паседжанне КС, прысвечаны інтэрвенцыі РФ у Беларусь. Выказваю глыбокую падзяку Аляксандру Навуковічу, Кааліцыі беларускіх дэмакратычных партый і ўсім валанцёрам, якія ўклалі сваю працу і энергію ў распрацоўку гэтага найважнейшага дакумента. Іх праца, заснаваная на энтузіязме і валявых намаганнях, заслугоўвае самага высокага прызнання.
Цяперашняе становішча Беларусі – гэта не проста вострая праблема, а пытанне самога існавання беларускай дзяржаўнасці і нацыі. Я катэгарычна абвяргаю тэзу аб тоеснасці злачыннага рэжыму лукашэнкі і беларускага народа. Гэта — штучна створаны прапагандысцкі міф. Беларускі народ — ахвяра рэжыму, захопленага Крамлём. Ён не нясе адказнасці за злачынствы гэтага рэжыму, у тым ліку выкарыстанне тэрыторыі Беларусі для агрэсіўнай вайны супраць Украіны. Злачынны рэжым лукашэнкі — марыянетка пуціна, і ўсе ягоныя рашэнні, прынятыя ва ўгоду Крамлю, з’яўляюцца нелегітымнымі.
Беларусь — ахвяра агрэсіі, а не агрэсар. Нашая краіна знаходзіцца пад акупацыяй, фактычна, з 1996 года, і гэта павінна быць афіцыйна прызнана на міжнародным узроўні. «Закон Лахвіча» — гэта важны крок да прызнання гэтай відавочнай ісціны.
Я поўнасцю падтрымліваю ініцыятыву Народнай Грамады і заклікаю ўсіх неабыякавых беларусаў актыўна ўдзельнічаць у падобных праектах. Палітычныя метады барацьбы — адзіны шлях да вызвалення нашай Радзімы і ўсталявання дэмакратыі. Мы абавязаны працягваць барацьбу за свабоду Беларусі і дабівацца прыцягнення да адказнасці ўсіх вінаватых у агрэсіі і акупацыі.
Гэта толькі пачатак. Старонка не перавернута, барацьба працягваецца. Жыве Беларусь!