Як разумець Біблію?Каб адказаць на гэтае пытанне, трэба сказаць, для чаго, уласна, прызначана Біблі…
Каб адказаць на гэтае пытанне, трэба сказаць, для чаго, уласна, прызначана Біблія, навошта Бог даў людзям Сваё Адкрыццё. Мэта Адкрыцця Божага — выключна збаўленне чалавека і прывядзенне яго да зносінаў з Богам.
Калі Бог даў людзям Сваё Адкрыццё, значыць, у гэтым была неабходнасць! Мэта Адкрыцця Божага — дапамагчы чалавеку зарыентавацца ў жыцці і здабыць збаўленне як вяртанне да паўнаты жыцця ў зносінах з Богам. Святое Пісанне — не падручнік фізікі або біялогіі, і нават не пратакол гістарычных падзей. Біблія найперш дае дакладнае і поўнае пазнанне пра Хрыста Збаўцу і пра шлях зносін з Богам. І ў гэтым пытанні Дух Святы натхняў святых пісьменнікаў так, што яны выклалі гэты шлях поўна і без недакладнасцей. Што ж тычыцца прыватных выпадкаў, якія не адносяцца да пытання збаўлення, напрыклад, наколькі дакладна была выкладзена гістарычная канва біблейскіх падзей або погляды святых аўтараў на тое ці іншае пытанне, не звязанае з рэлігійнай сферай жыцця, і да т.п., то тут не было патрэбы з боку Бога вывяраць кожную дробязь.
І гэта вельмі важна. Вядома, такая «вузкая накіраванасць» пакідае шмат непаразуменняў для навукі, якая глядзіць на Біблію як на гістарычную крыніцу. Але для веры ў Бібліі важна не знешняе, а ўнутранае. Галоўныя сэнсы Бібліі нязменныя і заўсёды актуальныя — не таму, што іх прыдумалі геніяльныя людзі, а таму, што яны былі адкрытыя Богам. Царква вучыць, што зразумець Біблію можа толькі чалавек, які жыве сапраўдным хрысціянскім жыццём, тады Дух Святы, які дзейнічае ў хрысціянах і, паводле слоў апостала Яна, вучыць усяму, на справе адкрые яму вечна жывыя і каштоўныя сэнсы Святога Пісання. Унутраны досвед хрысціяніна супадзе тады са знешнім словам Пісання, і нічога незразумелага для яго не застанецца. А без прасвятлення Духам Святым Біблія заўсёды будзе здавацца людзям чымсьці заблытаным, незразумелым, складаным і несучасным.