2 верасня 2025 г. спаўняецца 27 гадоў з дня смерці айца Яна Матусевіча (1948–1998), выдатнага белар…
Нарадзіўся Ян Матусевіч 24 ліпеня 1948 г. у Мінску ў пабожнай сям’і з уніяцкімі каранямі. Яго шлях да святарства быў няпростым: пераадольваючы перашкоды савецкага рэжыму, ён працаваў на розных прафесіях, вучыўся ў тэатральна-мастацкім інстытуце, але ўсё ж пачуў Божы кліч. Пасля службы ў Праваслаўнай Царкве ў Смаленску і Беларусі, у 1979 г. ён перайшоў у Каталіцкую Царкву, а пазней стаў адным з піянераў адраджэння Беларускай Грэка-Каталіцкай Царквы.
Айцец Ян служыў у Барунах, дзе ў 1988 г. адным з першых пачаў праводзіць Імшу на беларускай мове, а таксама ўдзяляў хрышчэнне ва ўсходнім абрадзе. Ён быў дэканам БГКЦ, актыўна падтрымліваў беларускую мову і культуру, быў сузаснавальнікам Беларускага біблейскага таварыства, удзельнічаў у грамадскіх рухах, асвяціў першы мемарыяльны крыж у Курапатах і выступаў за ўшанаванне памяці ахвяр сталінскіх рэпрэсій і Чарнобыльскай трагедыі.
Нягледзячы на пераслед з боку КДБ і цяжкую хваробу пасля аўтамабільнай аварыі, айцец Ян заставаўся нязломным духоўным правадніком. Ён памёр 2 верасня 1998 г., пакінуўшы пасля сябе яркую спадчыну. Сёння мы ўспамінаем яго як чалавека вялікай веры, любові да Бога і Беларусі, які натхняе сваім прыкладам.
Няхай памяць аб айцу Яне Матусевічу жыве ў нашых сэрцах!