By Belkorpus Не май другіх багоў перада Мною. Не рабі сабе ніякай выявы ўсяго, да таго падобнага, што ў небе высока, і што на зямлі ўнізе, і што ў вадзе пад зямлёю. Не пакланяйся ім і не служы, бо Я — Госпад, Бог твой. (Выхад 20, 3-5)
Малітва да Бога, у якой мы ўлічваем толькі ўласныя жаданні і не лічымся з воляй Бога і жаданнямі і патрэбамі іншых людзей, таксама грунтуецца на магічным мысленні, жаданні кіраваць іншымі і нават самім Богам.
Сталая малітва — гэта шчырая размова з Богам, поўная веры ў Яго блізкасць, прысутнасць і моц. Малітва, у якой мы цалкам аддаем нашы справы, клопаты і ўвесь свет у Божыя рукі. Бо Божая воля і сіла – па-над усё. Прыклад такой малітвы нам дае наш Збавіцель Ісус Хрыстос: “Ойча Мой! калі магчыма, няхай абміне Мяне чаша гэтая; але не як Я хачу, а як Ты” (Мц. 26, 39).
У Гасподняй малітве мы штодзённа праслаўляем Бога – “свяціся Імя Тваё”, давяраем Яму ўсё – “прыйдзі Валадарства Тваё, будзь воля Твая як у Небе, так і на зямлі”, просім падтрымкі – “хлеба нашага штодзённага дай нам сёння», просім прабачэння і абяцаем змяніцца — «адпусці нам грахі нашы, як і мы адпускаем вінаватым нашым» і спадзяемся на дапамогу — «не ўвядзі нас у спакусу, але збаў нас ад злога».
Толькі ў Богу спачывае душа мая, бо ад Яго — цярплівасць мая. Сапраўды, Ён — Бог мой і збаўленне маё, абарона мая — не пахіснуся. (Пс. 62, 6-7)