By Belkorpus Сусветны Дзень беларускай культуры – акцыя, прапанаваная Беларускай Радай культуры, каб стварыць новыя месцы і фарматы, у якіх голас і моц нашай культуры змогуць працягваць гучаць. Па-за межамі ды турэмнымі мурамі, насуперак гвалту, ціску ды забаронам. У вымушана пашыранай геаграфіі, падзеленасці і аддаленасці адно ад аднаго. Праз супольную акцыю мы зможам заставацца на сувязі, а магчыма, і канвертаваць агульную траўму – у агульную моц.
Сёлета актыўнасці ў розных краінах стартуюць 7 ліпеня і будуць працягвацца некалькі тыдняў, без фінальнай даты.
Чаму менавіта 7 ліпеня? У гэты дзень нарадзіліся Янка Купала, Марк Шагал і Ян Чачот, таксама ў ноч з 6 на 7 ліпеня многія беларусы святкуюць Купалле. Сёлета дата адметная яшчэ і юбілеямі Купалы і Шагала. Праекты, прысвечаныя знакавым для беларускай культуры асобам і падзеям, будуць прадстаўленыя цягам бліжэйшых месяцаў.
Калі вы хочаце далучыцца да глабальнага Дня беларускай культуры 7 ліпеня і/альбо ў далейшыя даты лета, ёсць шэраг варыянтаў, сярод якіх:
• Далучыцца да культурных мерапрыемстваў, якія праходзяць ў вашых гарадах (адмысловая мапа падзей з’явіцца на асобным сайце); • Сустрэцца з сябрамі ці зладзіць вечарыну для дыяспары; • Арганізаваць дваравую сустрэчу, канцэрт ці пікнік; • Адзець беларускі строй, сплесці вянок, узяць у рукі кветкі ды выправіцца на доўгі шпацыр па горадзе; • Ускласці кветкі да помнікаў беларускім дзеячам культуры, наведаць месцы пахавання знакамітых беларусаў; • Калі вы жывяце за мяжою – можаце ўзняць наш сцяг над мэрыямі вашых гарадоў, знакавымі мясцінамі ці проста вывесіць яго на акне вашай кватэры; • Спяваць беларускія песні; • Адсвяткаваць Купалле, запусціць феерверкі, намаляваць уласную папараць-кветку і загадаць галоўнае жаданне; • Падзяліцца са сваімі сваякамі, сябрамі і калегамі праграмай івэнтаў.
Разам з тым, Беларуская Рада культуры збірае дадзеныя пра любыя арт-актыўнасці беларусаў па ўсім свеце – на мапу культурных падзей ліпеня-жніўня, якая будзе размешчана на адмысловым веб-сайце.
Таксама @by_culture будзе радая дапамагчы з прамоцыяй вашых івэнтаў і падрыхтоўкай адпаведных прома-матэрыялаў.
Скарыстайцеся дызайнамі з брэнд-буку Дзён беларускай культуры.
Напішыце у тэлеграм менеджаркам:
@Wildest_Wind: што/дзе/калі вы збіраецеся ладзіць, каб з вамі маглі скаардынавацца па арганізацыйных і прамацыйных дэталях;
@maryiat – у прыватнасці, калі вы плануеце рабіць мерапрыемствы ў гарадах і мястэчках Польшчы.