Яўгенія ЯнішчыцМова Чую тваю жаўруковую музыкуЎ скошаных травах мурожных,Мова! Як сонца маё       бе…

Яўгенія Янішчыц
Мова
 
Чую тваю жаўруковую музыку
Ў скошаных травах мурожных,
Мова! Як сонца маё
       беларускае,
Ты свецішся словам кожным.
Цябе і заворвалі, і закопвалі.
I ўсё ж нашы продкі праз гора
Данеслі да нас цябе,
       родную, цёплую,
Жывую і непаўторную.
I калі ты мяне толькі паклічаш,
Памру за цябе без енку.
Нашу я любоў да цябе
       вялікую
У сэрцы сваім маленькім.

26 студзеня 1990 г беларуская мова набыла статус дзяржаўнай. Яна і зараз дзяржаўная. Фармальна. А рэальна… усе мы ведаем, што рэальна. Каб размаўляць па-беларуску ў Беларусі, патрэбна смеласць.

Але. Нягледзячы ні на што, яна побач. Прабіваецца, як трава скрозь асфальт у самых нечаканых месцах. Яна пароль і водгук беларусаў. Яна – у маленькіх сэрцах людзей, і ў вялікім сэрцы народа. І яе час прыйдзе зноў.

Жыве мова!
Жыве Беларусь!