Як дар ласкі «звязваць і развязваць» споведзь з’яўляецца прывілеем святарства, якое працягвае апостальскае служэнне. Св. Ян Залатавусны так велічна тлумачыць перадачу Хрыстом сваім вучням улады адпушчэння грахоў: «Святары Новага Запавету атрымалі ўладу не толькі быць сведкамі ачышчэння, але і ачышчаць. Яны атрымалі такую ўладу, якой Госпад Бог не даў ні арханёлам, ні анёлам, бо не ім сказана: «Што звяжаце на зямлі, будзе звязана і ў небе, і што развяжаце на зямлі, будзе развязана і ў небе» (Мц. 18, 18). Зямныя валадары маюць уладу звязваць, але толькі цела, у той час як путы святароў звязваюць самую душу і пранікаюць у нябёсы. Што святары выконваюць на зямлі, тое Бог здзяйсняе ў небе, і Госпад пацвярджае рашэнні сваіх слуг». Праз малітву разграшэння, якую прамаўляе святар, кожны каяннік атрымлівае Хрыстова прабачэнне.