By Belkorpus Калі нядбалы пастыр сустракае кагосьці такога, не кажа: «Сыне, калі збіраешся служыць Госпаду, падрыхтуй сваю душу да выпрабавання» (Сір 2, 1). Хто так кажа, умацоўвае слабога, робіць яго моцным і заахвочвае, каб хутчэй паверыў, не бачыў свайго шчасця ў дабрабыце гэтага свету. Калі прывыкне спадзявацца на зямны дабрабыт, то гэта прывядзе яго да падзення, бо калі сустрэнуць яго выпрабаванні, будзе цярпець, або нават зусім загіне.
Хто так будуе, той не будуе на скале, але закладвае падмурак на пяску. «Скалою быў Хрыстос» (1 Кар 10, 4). Таму хрысціяне павінны наследаваць цярпенні Хрыста, а не ганяцца за прыемнасцямі. Слабы чалавек умацоўваецца, калі чуе: «Рыхтуйся да спакусаў свету». Але ад усіх вызваліць цябе Госпад, калі тваё сэрца не аддаліцца ад Яго. Ён прыйшоў, каб цярпець дзеля твайго ўмацавання, прыбыў, каб памерці, прыйшоў, каб быць зняважаным, укаранаваным цернем, несправядліва асуджаным і ўрэшце быць прыбітым да крыжа. Усё гэта Ён сам зрабіў для цябе, ты ж нічога. Ён зрабіў не для Сябе, але для цябе.
Дык хто ж тыя, хто баіцца спалохаць слухачоў? Яны не толькі не рыхтуюць да блізкіх выпрабаванняў, але нават абяцаюць шчасце на гэтым свеце, чаго Бог зусім не абяцаў свету. Госпад прадказаў свету бясконцыя пакуты і цярпенні; ты ж прагнеш, каб хрысціянін быў вольны ад іх? Менавіта таму, што з’яўляецца хрысціянінам, будзе больш цярпець у гэтым свеце.
Таму Апостал кажа: «Усе, хто жадае жыць пабожна ў Хрысце Ісусе, будуць пераследаваныя» (2 Цім 3, 12). А ты, пастыр, які шукаеш уласнай карысці, а не Ісуса Хрыста, калі Апостал абвяшчае: «Усіх, хто жадае жыць пабожна ў Хрысце, будуць пераследаваныя», кажаш: «Калі будзеш пабожна жыць у Хрысце, будзеш радавацца шматлікімі дабротамі. Калі не маеш дзяцей, будзеш іх мець, выкарміш усіх і ніводнае не памрэ». Так будуеш? Глядзі, што робіш, на чым будуеш. Ты будуеш на пяску. Пойдуць дажджы, падымецца рака, павеюць вятры, удараць у дом, і ён упадзе, і яго падзенне будзе вялікім.
Забяры з пяску, будуй на скале. Той, каго хочаш мець хрысціянінам, няхай будзе збудаваны на Хрысце. Няхай разважае ён над несправядлівай мукай Хрыста, няхай паразважае, што той, хто не ўчыніў ніякага граху, заплаціў доўг, якога не меў, няхай паразважае над скіраванымі да яго словамі Пісання: «Госпад б’е кожнага, каго прымае як сына» (Гбр 12, 6).
Св. Аўгустын