By Belkorpus 
7 траўня 2023 г. у сьвята Жыровіцкай іконы Маці Божай сваё парафіяльнае сьвята адзначылі грэка-католікі Івацэвічаў. Сьвяточную багаслужбу ўзначаліў а. Алесь Шыбека з Менску, разам з якім служылі а. Віталь Быстроў і дыякан Вячаслаў Гарчакоў з Івацэвічаў. Памаліцца перад Жыровіцкай іконай Багародзіцы на сьвята ў Івацэвічах прыехалі пілігрымы з Менску і Берасьця.
Падчас сьвята адбылося асьвячэньне рэпрадукцыяў старажытных уніяцкіх абразоў з Жыровіцкага манастыра з выявамі сьвятых апосталаў для алтарнай часткі капліцы ў Івацэвічах, якое зрабіў а. Віталь Быстроў.
Дыякан Вячаслаў Гарчакоў прадставіў прысутным вернікам нядаўна выдадзеную брашуру а. Яўгена Ўсошына і архім. Сяргея Гаека «Беларускі грэка-каталіцкі пакутнік Антон Неманцэвіч (1893–1943). Выданьне мае наклад 500 асобнікаў і яго можна набыць у грэка-каталіцкіх парафіях Беларусі.
Напрыканцы літургічнай часткі сьвяткаваньняў вернікі прасьпявалі «Многія леты» маладой парафіянцы Ірыне Быстровай.