7 ліпеня нездарма распачаў шэраг Сусветных дзён беларускай культуры сёлета, бо ў гэты дзень багата н…

7 ліпеня нездарма распачаў шэраг Сусветных дзён беларускай культуры сёлета, бо ў гэты дзень багата нарадзілася знакамітых дзеячаў культуры на нашай зямлі

Ян Чачот — адзін з пачынальнікаў новай беларускай літаратуры, адносіцца да тых першых пісьменнікаў XIX ст., якія, традыцыйна выкарыстоўваючы ў літаратурнай творчасці польскую мову, сталі пісаць па-беларуску. Сёння б яму споўнілася 226 гадоў!

Да мілых мужычкоў

Ды і я вам памагу
Песеньку спяваці,
Ды і я ж між вамі ўзрос
Пры бацьку і маці.

I мне Бог на свеце даў
Гора гараваці,
Штобы лепш я вас любіў
I ўмеў спагадаці.

Ой, што ж вы напелі тут,
Ды якога дзіва!
Шкода, што на голас ваш
Старонка драмліва.

Але як прачнецца з сну
Гэта Дабрадзейка,
Пэўна, будзе слухаць вас
Лепш, як салавейка.

Будзем колісь так і мы,
Як тыя гуралі,
Што пан даў ім есць і піць,
Яшчэ й грошы бралі.

Трэба толькі слухаць нам
Рады таго татка,
Што то казаў гараваць,
Каб аджыла хатка.

Толькі, мусіць, той сынок
Не піў, як мы, водкі,
А то б яму вялеў ён:
Кінь і мёд салодкі.

Ой, гаруйма, братцы, мы,
Кіньма горку жлопель,
Што не з жыта гоняць ўжо,
А з аўса, з картопель.

Кіньце першы, жонкі, вы,
Мілыя дзяўчаты,
Доля, шчасце зачне жыць,
Дзе цвяроза хата.

Благаславіць будзе Бог
Ў каморы, аборы,
I не будзе такі люд
Бяссільны, як хворы.

Ой, каб колісь нам дажыць
Да такой паправы,
То запеў бы з вамі я,
Што нам Бог ласкавы!

1825-1846?