By Belkorpus Спявачка, якая стала вядомай у 2020 годзе з народным хітом «Шчучыншчына», вяртаецца з новым трэкам «Узда!».
“Для мяне гэта не проста музычная кампазіцыя, а сапраўдны гімн любові да малой радзімы. Мне прыемна з цеплынёй і лірызмам апяваць горад Узду, яго славутасці. У прыватнасці, знакаміты дыска-бар «Арбіта», дзе прайшло нямала незабыўных творчых вечароў,” — паведаміла Алена карэспандэнту, які пракраўся на здымачную пляцоўку кліпа на песню «Узда!».
Рэжысёрам будучага аўдыявізуальнага шлягера стаў Андрэй Кашперскі, сумна вядомы па стварэнні серыяла «Працэсы».
“Для мяне гэта не проста відэакліп, а споведзь, зафіксаваная на цэлюлоідзе. Думаю, кожны знойдзе ў гэтым музычным фільме нешта для сябе. Бо менавіта ў гэтым і ёсць сутнасць мастацтва — гаіць душы і сэрцы.”
Падчас дабрачыннага аўкцыёну на фестывалі «Летуцень» у Кракаве адным з лотаў было напісанне песні, прысвечанай гораду. Пераможца аўкцыёну Мікалай абраў Узду у якасці населенага пункту, пра які спяе Алена ЖалудОк, бо гэта родны горад яго дзяўчыны Наталлі.
У відэакліпе выкарыстана архіўная кінахроніка. Ганаровыя чальцы ЧынЧынЧэнэл, Сяргей Мікалаевіч і Мікалай Сяргеевіч, паўстануць перад гледачамі, так бы мовіць, без гальштукаў (але ў гальштуках).
Кампазіцыя і кліп «Узда!» цалкам адпавядаюць прававым нормам, тэхнічным патрабаванням і традыцыйным каштоўнасцям.