Днямі з’явілася інфармацыя, што Літва ўзмацняе абарону ад варожага ўплыву. Сейм краіны ўхваліў выкарыстанне паліграфа для асоб, якія прэтэндуюць на доступ да дзяржаўных таямніц, а ў асобных выпадках і для тых, хто атрымлівае дазвол на жыхарства. Ва ўмовах бягучай гібрыднай вайны пытанні бяспекі, даверу і супрацьдзеяння агентурнаму ўплыву з боку лукашысцкіх і расійскіх спецслужбаў становяцца нормай.
Менавіта таму лідар фракцыі Рух Воля Мікіта Забуга публікуе вынікі свайго праходжання паліграфа. Гэта не жэст піяру, а прыклад асабістай адказнасці для тых, хто працуе з адчувальнай інфармацыяй і прэтэндуе на давер грамадства.
Мы перакананыя, што ў дэмакратычных структурах празрыстасць, адказнасць і бяспека павінны быць не менш важнымі за адкрытасць. Асабліва калі гаворка ідзе пра супрацьдзеянне агентуры аўтарытарных рэжымаў.
Заклікаем нашых калег з Каардынацыйнай рады далучыцца да ўмацавання бяспекі прадстаўнічага органа беларускіх дэмакратычных сілаў і прайсці працэдуру паліграфа з наступнай публікацыяй яе вынікаў.
Бяспека пачынаецца з сябе.
Жыве Беларусь!