«Каб падтрымаць беларускіх пісьменніц». Заснаваная прэмія Евы Вежнавец
Кніжная супольнасць абвясціла прэмію Евы Вежнавец (Святланы Курс). Журы будзе ацэньваць не асобную кнігу, а ўсю творчую працу беларускіх пісьменніц, якіх будуць узнагароджваць.
«Мы засноўваем прэмію, каб ушанаваць памяць Евы Вежнавец і падтрымаць беларускіх пісьменніц. Прэмія будзе прысуджацца беларускай пісьменніцы. Журы будзе ацэньваць не асобную кнігу, а ўсю творчую працу аўтаркі», – паведамляецца ў Telegram-канале прэміі.
Прызавы фонд пачнуць збіраць 9 жніўня на кніжным кірмашы ў бары Karma Crew: у скарб пойдзе частка прыбытку ад продажу кніг. Пазней для папаўнення фонду адкрыюць адмысловы збор. Лаўрэатка атрымае ўсю сабраную суму, памер прэміі абяцаюць раскрыць. Першую пераможцу ўзнагародзяць да канца гэтага года.