Памёр апошні з братоў Бельскіх — вядомых партызанаўПайшоў з жыцьця Арон Бельскі — апошні з чатырох б…

Пайшоў з жыцьця Арон Бельскі — апошні з чатырох братоў, якія ў часы ІІ усясьветнай вайны заснавалі ў Налібацкай пушчы найбуйнейшы габрэйскі партызанскі рух у Эўропе — свой атрад, які яшчэ называлі «Лясным Ерусалімам». Атрад заснавалі браты Бельскія — Тувія, Асаэль, Зусь і Арон. Звыш тысячы чалавек уратаваліся ў ім ад Галакосту. Туды бралі ня толькі ўзброеных людзей, а ўсіх, каго маглі ўратаваць.

Пра сьмерць Арона паведаміла старонка The legacy of the Belsky brothers.

«Апошні з магіканаў памёр, адзначыўшы канец эпохі тых, хто перажыў Галакост. Выказваю шчырыя спачуваньні ўсім, хто ведае пра партызанаў Бельскіх у сувязі са сьмерцю Арона Бэла. Арон Бельскі быў самым малодшым з братоў Бельскіх і сапраўдным Бельскім у шырокім сэнсе гэтага слова. Цалкам адданы памяці сваіх братоў і бацькоў, ён ніколі не казаў пра сябе як пра героя, для яго героямі былі ягоныя браты. Ён таксама быў абавязаны ім сваім жыцьцём, як і тысячы іншых габрэяў. Нягледзячы на ​​ўсе свае недахопы, ён жыў з Богам у сэрцы і лічыў любоў сапраўднай каштоўнасьцю жыцьця. Спадчынная трываласьць, любоў і ўдзячнасьць Арона дазволілі яму пражыць доўгае жыцьцё і несьці спадчыну братоў Бельскіх. Быць Бельскім было для яго вялікім гонарам. Няхай яго душа спачывае зь мірам!» — напісала Тамара Вяршыцкая, дасьледніца, якая стварала ў Наваградку Музэй габрэйскага супраціву.

Браты пасьля вайны адправіліся ў Польшчу, а адтуль у Ізраіль. Затым жылі ў ЗША. Пра братоў здымалі фільмы і пісалі кнігі, а ў Савецкім Саюзе іхную дзейнасьць пачалі замоўчваць.

На здымку Арон Бельскі ў Налібацкай пушчы ў ліпені 2019 году на сустрэчы нашчадкаў сяброў атраду.