By Belkorpus 
«Вось ужо чатыры гады Алесь знаходзіцца ў турме. Глыбокі шанавальнік беларускай культуры, заснавальнік Праваабарончага цэнтра «Вясна», лаўрэат Нобелеўскай прэміі міру, аўтар дзясяткаў кніг — беларус, які кожны дзень свайго жыцця шукаў шляхі, як дапамагчы, падтрымаць і абараніць. Чалавек, які прысвяціў усё сваё жыццё правам чалавека ў Беларусі, быў пакараны за сваю дабрыню і імкненне да справядлівасці.
У гэтым годзе Алесю споўніцца 63 гады. Яшчэ не прайшла і палова прызначанага яму тэрміну, а здароўе ў зняволенні ўжо пачало пагаршацца. Калі ласка, пішыце яму лісты, нават калі не ўсе з іх даходзяць. Чытайце яго кнігі, каб захапляцца думкамі чалавека, які за ўсё жыццё не здрадзіў прынцыпам і не адступіўся ад маралі. Такія людзі, як Алесь, — гэта сумленне нашай краіны. Мы здолеем захаваць яго спадчыну і наблізіць той дзень, калі Алесь будзе зноў на свабодзе займацца справай свайго жыцця — дапамагаць іншым»