Тыдзень таму на нашым імправізаваным вечары для тых, хто любіць і кахае, ментарка Dapamoga Таццяна …

Тыдзень таму на нашым імправізаваным вечары для тых, хто любіць і кахае, ментарка Dapamoga Таццяна прачытала верш пра любоў — пра любоў да беларускай мовы

Аўтар верша — Андрэй Хадановіч.

Сёння, у Дзень роднай мовы, мы дзелімся гэтым відэа з вамі. Бо любіць — гэта не толькі пра людзей. Гэта яшчэ і пра мову. Пра карані. Пра сябе.

Глядзіце, слухайце, адчувайце

Жыве беларуская мова!

МОВА

Кожная мова напоўнена ўласным сэнсам.
Кажуць, што па-нямецку добра займацца сэксам:
вывучыць нескладана – руляць галосныя гукі.
Па-беларуску любяць матчыны рукі.

Па-французску клінкамі звіняць і плятуць інтрыгі,
мараканцы й алжырцы пішуць рэпчыкі й кнігі,
цёплыя круасаны трушчыць буржуазія.
Па-беларуску скандуюць: “Беларусь – не Расія”.

У рускай мовы гарачка ад белай гарэліцы.
Добры паэт не засіліцца, дык застрэліцца.
Чорныя пісталеты помняць Бальшыя Карэтныя.
Па-беларуску друкуюць вершы паліткарэктныя.

Украінскаю мовай гучыць салаўіны пошчак,
з гэтым пошчакам добра працуецца ў Польшчах,
покуль палякі ў Брытаніі топчуць кеды.
Па-беларуску працуюць адны дармаеды.

Помняць белага брата хіндзі і суахілі.
Па-габрэйску каменьчык моліцца на магіле.
Па-ангельску маўчанне доўжыцца з Чарлі Чаплінам.
Па-беларуску над Віліяй гучна вяшчаюць чаплі нам.

Вы даўно зразумелі, што я маю наўвеце:
беларуская мова – найпрыгажэйшая ў свеце.

З кнігі “Школа травы”, 2019.