By Belkorpus 
Дзякуючы працы нашых гераічных валанцёраў, ва ўмовах маштабных рэпрэсій дагэтуль працягваецца распаўсюд самвыдату ў Беларусі. Незалежныя папяровыя газеты застаюцца надзейнай крыніцай інфармацыі для многіх беларусаў.
З нядаўняга часу наш самвыдат з’явіўся яшчэ і ва Украіне. Мы ўжо распавядалі, што актывісты мясцовай дыяспары пачалі выдаваць на ўкраінскай мове газету «Вісник», каб пашыраць інфармацыю пра Беларусь і беларусаў. Апошні нумар для друку дасяжны па спасылцы.
Рэдактар і вярстальнік газеты «Вісник» – Юрась, валанцёр ByProsvet, які дапамагаў у стварэнні і распаўсюдзе самвыдату на Радзіме, але праз пераслед сілавікоў быў вымушаны з’ехаць ва Украіну. Там ён таксама працягвае вярстаць газету «Беларускі час», якую штотыдзень актывісты разносяць па паштовых скрынях у Беларусі. Падрабязней з гісторыяй выбітнага беларуса вы можаце азнаёміцца ў артыкуле ды відэа.