By Belkorpus Адмыслова для вас мы склалі гайд , як мінімальнымі высілкамі дадаць у сваё жыццё больш беларускай мовы.
Android
1)Зайсці ў налады, выбраць «Пашыраныя налады» і націснуць «Мову і ўвод».
2)У першым пункце – «Мовы» – можна выбраць мову, на якой будзе адлюстроўвацца інтэрфейс вашага тэлефона. А каб дадаць беларускую раскладку, трэба выбраць пункт «Кіраванне клавіятурамі» – «Клавіятура SwiftKey» – «Налады».
3)Самы першы пункт у плітцы – «Шматмоўная». Пры націсканні бачны спіс даступных моў. Калі ў пункце «Прапанаваныя мовы» беларуская мова адсутнічае, пракруціце ўніз, націсніце «Усе мовы» і знайдзіце ў спісе беларускую мову. Націсніце на назву мовы, потым націсніце «Загрузіць».
4)Будзе загружаны моўны пакет. Раскладка будзе аўтаматычна актывавана, вам застанецца націснуць на вялікую пімпу з «галачкай».
iOS
Калі ў вас iPhone, то, пачынаючы з iOS 11, ёсць магчымасць уключыць беларускую раскладку.
1)У наладах выберыце «Асноўныя», потым «Клавіятура».
2) Націсніце на «Клавіятуры», выберыце «Новыя клавіятура».
3)У спісе моў знайдзіце «Беларуская».
Усё гатова! Гэты спосаб, дарэчы, прыстасоўны і да iPad.
Windows 10
1)Націснуць значок апавяшчэнняў справа ўнізе (там, дзе гадзінік) і выбраць «Усе параметры».
2)Выбраць пункт «Час і мова», перайсці на ўкладку «Мова».
3) Націснуць «Дадаць мову інтэрфейсу Windows у Microsoft Store».
4)Выбраць «Пакет лакалізацыі беларускай мовы». Калі не можаце знайсці гэты пункт, скарыстайце пошук – пімпа Search уверсе справа.
5)Націснуць «Get», адзначыць «галачкамі» пункты «Усталяваць у якасць мовы інтэрфейсу» і «Усталяваць пакет моў», націснуць «Усталяваць».
P.S. А ці ведалі вы, што распрацоўнікі праграм і сайтаў збіраюць статыстыку па выкарыстанні той ці іншай мовы? Дык вось, чым больш карыстальнікаў абярэ беларускую мову, тым больш матывацыі ў распрацоўнікаў будзе падтрымліваць і пашыраць яе выкарыстанне ў сваіх сэрвісах.
То – наперад!