Фракцыя “Каманда Латушкі і “Рух “За Свабоду” заяўляе, што падтрымлівае прыняцце пратаколу аб узаемадзеянні паміж Каардынацыйнай радай, Аб’яднаным пераходным Кабінетам і офісам Святланы Ціханоўскай, які ў тым ліку акрэслівае тэрмін дзейнасці Святланы Ціханоўскай у якасці лідаркі дэмакратычных сіл.
Мы лічым прагучаўшую на ІІІ Канферэнцыі “Новая Беларусь” прапанову прадстаўніка фракцыі Пракопьева-Ягорава-Кныровіча пра прызнанне легітымнасці таго, што адбываецца ў Беларусі, і накіраванне заходніх паслоў у Беларусь (то бок легітымізацыю Лукашэнкі и масавых рэпрэсіяў), а таксама заяву фракцыі Пракопьева-Ягорава-Кныровіча аб дэлігітымізацыі Святланы Ціханоўскай пасля жніўня 2025 года, а менавіта пасля так званых прэзідэнцкіх выбараў у Беларусі – палітычнымі правакацыямі.
Дадзеныя дзеянні накіраваны на раскол дэмакратычных сіл Беларусі і, нажаль, дапамагаюць рэжыму Лукашэнка дасягнуць сваей мэты – знішчэння палітычнай альтэрнатывы ягонаму рэжыму.
Мы не прызнаем легітымнасць узурпатара Лукашэнкі.
Мы не прызнаем за ім і ягонымі нелегітымнымі органамі права на арганізацыю выбараў у Беларусі.
Мы ўпэўнены, што рэжым Лукашэнкі будзе рабіць усе, каб пасля 2025 года ў беларусаў не было легітымнага дэмакратычнага прадстаўніцтва на міжнароднай арэне і ўжо зараз да гэтага вядзецца актыўная падрыхтоўка.
Зыходзячы з вышэйсказанага мы выступаем за павышэнне эфектыўнасці і еднасці дэмакратычнага руху напярэданні так званых выбараў 2025 года, падтрымліваем і будзем надалей працаваць на ўзмацненне інстытутаў дэмакратычных сіл Беларусі, падтрымліваючы дзейнасць і статус Святланы Ціханоўскай у якасці нацыянальнай лідаркі да правядзення новых дэмакратычных выбараў у Беларусі.
Жыве Беларусь!
08.09.2024