27 ліпеня 1990 года Вярхоўны Савет БССР прыняў Дэкларацыю аб дзяржаўным суверэнітэце Беларусі. Менавіта гэты дакумент стаў прававой асновай, якая ўжо праз год дазволіла абвясціць незалежнасць краіны. Невыпадкова ў 1991–1996 гадах 27 ліпеня было дзяржаўным святам — Днём Незалежнасці Беларусі.
Але ў 1996 годзе Лукашэнка адмяніў гэтае свята, замяніўшы яго 3 ліпеня — датай, звязанай не з беларускай дзяржаўнасцю, а з савецкай гісторыяй.
Сімвалічна, што яшчэ ў 1990 годзе, будучы дэпутатам Вярхоўнага Савета, Лукашэнка не падтрымаў Дэкларацыю аб дзяржаўным суверэнітэце. І за наступныя дзесяцігоддзі яго палітыка толькі пацвердзіла гэтае стаўленне: Беларусь стала ўсё больш залежнай ад Расіі, а нацыянальная мова, культура і сам суверэнітэт краіны апынуліся пад пастаянным ціскам.
Сапраўдная незалежнасць — гэта права народа самастойна вызначаць сваю будучыню. І менавіта за такую Беларусь працягваюць змагацца тысячы беларусаў.