— Як узнікла ідэя распачаць серыю квізаў?
— Квізаў існуе шмат. І вядомых, і ня вельмі. Але беларускіх і пра Беларусь не было. Я зразумеў, што такі формат актыўнасьці — гэта актуальная, запатрабаваная і трэндавая пляцоўка для разьвіцьця Беларусі. І пачаў рабіць.
— Якую місію ты ставіш перад сабой і сваім праектам?
— Асноўная мэта квізу — ня быць банальным, а таксама паказаць беларус_кам (і сабе таксама), што нашая краіна і нацыя маюць глыбокую і цудоўную гісторыю, культуру, мову, літаратуру, навуку і г.д. Так бы мовіць, папулярызацыя брэнду «Беларусь» у сапраўдным ягоным разуменьні.
— З якімі цяжкасцямі ты сутыкаешся пры арганізацыі мерапрыемстваў?
— Асаблівых цяжкасьцяў няма. Адзінае — гэта прыдумляць штосьці новае, шукаць цікавосткі, каб заахвоціць людзей гуляць. Хочацца чагосьці эксклюзіўнага. Быць выключна беларускім квізам — гэта ўжо эксклюзіў, але мы прагнем якаснага кантэнту.
— Што цябе матывуе працягваць займацца гэтай дзейнасцю бясплатна?
— Я пачаў гэтым займацца для сябе, бо самастойна даведваюся шмат чаго новага й цікавага. А самаразьвіцьцё (асабліва ў беларускім накірунку) — гэта заўжды добра. Прыемна гэтыя веды рухаць у масы. Бачыць зацікаўленыя вочы беларусаў, якія пачынаюць ганарыцца сваім — лепшая матывацыя й узнагарода.
— Як твае мерапрыемствы дапамагаюць беларускай суполцы?
— Мы прытрымліваемся чоткіх межаў беларускасьці: гаворым па-беларуску, гуляем па-беларуску, вывучаем Беларусь, папулярызуем брэнд Беларусі. Мы выхоўваем у сабе сапраўдных беларусаў, якіх хоча бачыць дэмакратычны сьвет у сёньняшняй геапалітычнай сытуацыі.
— Чым ты больш за ўсё ганарышся за час існавання квізаў?
— Гульнявыя забавы ператварыліся на сапраўдныя спаборніцтвы са сваімі спрэчкамі і добрай канкурэнцыяй. Гэта менавіта тое, чаго я хацеў ад квізаў, і я гэта атрымаў. Гэтым і ганаруся. І яшчэ нашыя фірмовыя стыкерпакі — гэта гонар!