By Belkorpus Намеснік кіраўніка Кабінета Валер Кавалеўскі:
«На форуме мы даводзілі ўкраінскаму боку, што ўлады Украіны могуць больш выразна фармуляваць у міжнароднай палітыцы тэзіс аб тым, што без дэмакратычнай Беларусі не будзе бяспекі для Украіны і для ўсяго рэгіёна. Бо голас Украіны зараз добра чутны па ўсім свеце. Гэта дапаможа нам вырашыць задачу, у якой зацікаўлены абодва бакі.
Таксама абмеркавалі пытанне аб атрымані беларусамі ВНЖ, разблакаванне банкаўскіх рахункаў беларусаў, пытанне беларускіх добраахвотнікаў. Абодва бакі прызналі, што нам не хапае інфармацыі адзін пра аднога, нейкіх супольных крыніц даставернай інфармацыі – мы вырашылі працаваць над гэтым. Я ўбачыў гатоўнасць удзельнікаў форуму да сумесных праектаў і працягу дыялогу. І мы яго працягнем, пакуль не дасягнем жаданых вынікаў».
Суарганізатар форуму Валерый Мацкевіч:
«Форум складаўся з васьмі панэляў, у нас атрымалася забяспечыць удзел больш чым 30-ці моцных спікераў з абодвух бакоў. Гэта быў добры пачатак. Мы ўжо пачалі абмеркаванне з нашымі украінскімі калегамі сумесных планаў на будучы год».