By Belkorpus Шматлікія архітэктурныя аб’екты былі разбураныя і занядбаныя пад ціскам культурнай асыміляцыі, савецкай палітыкі і вайны. Гэтыя помнікі — адлюстраваньне нацыянальнай памяці і беларускай ідэнтычнасьці, якую спрабавалі сьцерці ці перапісаць на працягу доўгіх гадоў.
Каб захаваць культурную спадчыну і вярнуць беларусам іх гісторыю, беларусы Кіпру зрабілі плятформу XRAYTOURS.
Вось, што кажа Мацьвей, аўтар і распрацоўшчык плятформы:
«Мы ствараем інавацыйную плятформу, якая ставіць перад сабой задачу захаваньня й аднаўленьня страчаных помнікаў архітэктуры Беларусі.
Выкарыстоўваючы перадавыя тэхналёгіі 3D-мадэляваньня, дапоўненай і віртуальнай рэальнасьці, мы ствараем дакладныя рэканструкцыі, якія вяртаюць да жыцьця спадчыну, што зьнікла з рэальнага сьвету.
Гэты праэкт ня толькі адраджае гістарычныя аб’екты, але й надае ім новае жыцьцё ў віртуальнай прасторы, даючы магчымасьць дасьледаваць іх як ніколі раней.
Разам мы можам захаваць гісторыю і перадаць яе будучым пакаленьням у найлепшым выглядзе!»
Пераходзьце на сайт і атрымайце ўнікальную магчымасьць апынуцца ў мінулым, блукаць па вуліцах старажытных беларускіх гарадоў і ацаніць веліч архітэктуры мінулых стагодзьдзяў.